Bizneset, jo më pronarë të fshehtë – 10 mijë dollarë gjobë kush nuk zbardh aksionerët e vërtetë brenda apo jashtë kufijve
Nga 28 gushti bizneset do të jenë të detyruara të zbardhin pronarët apo zotëruesit e aksioneve, qofshin këta brenda apo jashtë kufijve, ndërkohë që do të përballen me penalitete të ashpra nëse nuk e bëjnë këtë sipas afateve të përcaktuara në ligj. Është publikuar tashmë në Fletoren Zyrtare Ligji për Pronarët Përfitues, të cilët do të pasqyrohen në një regjistër të posaçëm.
Ndërsa Ligji I ri përcakton qartë subjektet dhe personat që kanë detyrimin ligjor për të raportuar pronarët apo zotëruesit fundorë të aksioneve, parashikon dhe gjoba të kripura për ata që nuk respektojnë afatet e dërgimit të të dhënave. Mos-regjistrimi fillestar i të dhënave për pronarin përfitues të tij brenda afatit të përcaktuar në shkronjën “a” të pikës 3 të nenit 5 të këtij ligji dënohet me gjobë në vlerën 500 000 lekë, apo afërisht 5 mijë dollarë;
Mos-regjistrimi i çdo ndryshimi në të dhënat e regjistruara dhe në dokumentet shoqëruese, që depozitohen në regjistër, brenda afatit të përcaktuar dënohet me gjobë në vlerën 250 000 lekë, apo rreth 2.500 dollarë;
Mospërmbushja e detyrimit të subjekteve raportuese ekzistuese për regjistrimin e të dhënave të kërkuara nga ky ligj brenda afatit të përcaktuar dënohet me gjobë në vlerën 250 000 (dyqind e pesëdhjetë mijë) lekë.
Për shkeljet e parashikuara në pikën 2 të këtij neni dënohet me gjobë prej 150 000 lekësh edhe përfaqësuesi ligjor I subjektit të regjistruar, person juridik.
Për subjektet, që kryejnë shkeljet e parashikuara ligj për më tepër se një herë, gjobat do të dyfishohen.
Gjoba vendoset nga titullari i QKB-së, vendimi i të cilit ankimohet drejtpërdrejt në gjykatën administrative kompetente në përputhje me parashikimet e Kodit të Procedurave Administrative, përcakton ligji për Pronarët Përfitues.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.