Bizneset me statusin pasiv – DPT: Mënyrat për të paguar tatimin mbi dividendin
Drejtoria e Përgjithshme e Tatimeve ka dhënë së fundmi disa informacione si përgjigje ndaj interesimit të tatimpaguesve mbi teknikat e deklarimit dhe mënyrën e pagesës së tatimit mbi dividendin kur janë në status pasiv.
DPSH tha se ka dy mënyra deklarimi të shpërndarjes së dividendit, fitimin e mbartur nga periudhat e mëparshme, për tatimpaguesin në status pasiv, i cili për këtë periudhë nuk paraqet deklarata periodike tatimore.
Sipas njoftimit mënyra e parë është kalimi nga regjistri pasiv në regjistrin aktiv të administratës tatimore.
Së pari DPT tha se tatimpaguesi riaktivizohet në Qendrën Kombëtare të Biznesit në rast se kërkesa për pezullim është kryer nga vetë tatimpaguesi pranë QKB-së. Pas këtij ndryshimi, statusi i ndryshuar pasqyrohet automatikisht nga sistemi elektronik i QKB-së në sistemin e DPT-së, me datë të vlefshme aktivizimi datën e miratimit të aktivizimit në QKB. Së dyti, tatimpaguesi riaktivizohet në zyrat e regjistrimit të DRT-ve përkatëse nëpërmjet një kërkese, në rastet kur statusi i tij në pasiv është vendosur nga administrata tatimore. Statusi i ri do të jetë me datë të vlefshme aktivizimi, datën e miratimit të kërkesës së tij.
DPT tha se pas riaktivizimit me anë të një prej mënyrave të mësipërme, tatimpaguesi deklaron dividendin në deklaratën e Tatimit në Burim, por gjithashtu dorëzon edhe të gjitha deklaratat për periudhën përkatëse, sipas përgjegjësive tatimore për të cilat është regjistruar. Pasi detyrimi të jetë përmbushur, tatimpaguesi mund të ndryshojë statusin e tij pranë QKB-së, duke u rivendosur përsëri në regjistrin pasiv.
Mënyra e dytë sipas njoftimit është duke dorëzuar deklaratë të re tatimore, me ndryshime të tatimit në burim për periudhën e fundit aktive.
Së pari kjo deklaratë e re mund të dorëzohet nga vetë tatimpaguesi nëse periudha që do të ndryshohet është brenda 36 muajve nga afati i dorëzimit të deklaratës fillestare. Së dyti në rastet kur periudha që do të ndryshohet është jashtë 36 muajve nga afati i dorëzimit të deklaratës fillestare, ndryshimi kryhet nga administrata pas kërkesës me shkrim nga tatimpaguesi.
DPT gjithashtu tha se detyrimi i deklaruar dhe i detyrueshëm për t’u paguar sipas deklaratës së ndryshuar, do të përfshijë përveç principalit edhe kamatëvonesat për periudhën ndërmjet afatit të dorëzimit të deklaratës fillestare dhe datës së dorëzimit të deklaratës tatimore të ndryshuar, për llogaritjen e të cilave zbatohen dispozitat e këtij ligji.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.