Bizneset në Eurozonë – Tregojnë performancën më të mirë në 6 vite
Bizneset prodhuese në Eurozonë kanë patur performancën më të mirë mujore në 6 vite e gjysmë gjatë Gushtit, duke kompensuar për ngadalësimin në sektorin e shërbimeve dhe duke mbajtur aktivitetin e përgjithshëm në një ritëm të qëndrueshëm.
Indeksi IHS i kompanisë Markit, që formohet nëpërmjet sondazheve drejt mijëra firmash, që shihet si një tregues i saktë mbi rritjen ekonomike, është rritur në 55.8 pikë në muajin Gusht, nga 55.7 që ishte në Korrik. Çdo shifër sipër 50 pikëve tregon për një ekspansion.
Aktiviteti prodhues u rrit me normën më të shpejtë që prej Prillit 2011, nxitur nga porositë e reja për eksporte.
Megjithatë, indeksi tregoi një ngadalësim në firmat e sektorit të shërbimit, duke rënë në nivelin më të ulët në 7 muaj.
Të dhënat e fundit nga sondazhet sinjalizojnë një rritje me 0.5% të ekonomisë së Eurozonës për tremujorin e tretë, krahasuar me 0.6% që ishte në të dytin.
Megjithatë, norma është më e lartë se projeksionet e analistëve për një rritje me 0.4% në tremujorin e tretë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.