Bizneset në Japoni, optimiste – Indeksi i manifakturës prek nivelin më të lartë në 7 muaj

Besimi i biznesit të manifakturës në Japoni ka prekur nivelin më të lartë në shtatë muajt e fundit, gjatë Gushtit, kryesisht falë rimëkëmbjes së ekonomisë globale.

Por, sipas një vëzhgimi të Reuters, besimi i sektorit të shërbimeve preku nivelin më të ulët që nga viti 2016, duke shtuar dyshimet për ngadalësimin e kërkesës së brendshme.

Rezultatet mikse të sondazhit, që vëzhgohet nga afër nga Banka e Japonisë, nënvizojnë brishtësinë e ekonomisë që doli nga kontraktimi në tremujorin e parë të këtij viti. Gjithashtu, sipas Reuters indeksi i sektorit të manifakturës parashikohet të rritet edhe më tej gjatë tre muajve në vijim, pavarësisht shqetësimeve që kanë të bëjnë me tensionet tregtare globale dhe problemeve të ekonomive në zhvillim. Gjithashtu, edhe indeksi i sektorit të shërbimeve parashikohet të rritet, pas ngadalësimit në gusht, kryesisht për shkak të motit aspak normal, me temperatura të larta dhe përmbytje.

Në sondazhin me 483 kompani të mëdha dhe të mesme, shumica e të anketuarve shprehën shqetësime në lidhje me tensionet tregtare mes SHBA dhe partnerëve të tjerë.

Ekonomia e Japonisë u rrit me një normë vjetore prej 1.9% në tremujorin e dytë të këtij viti, e mbështetur nga shpenzimet konsumatore dhe të bizneseve, duke dalë nga kontraktimi i tremujorit të parë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.