Bizneset në “ngritje” të vështirë – Tatim-fitimi/ Të ardhurat sa në vitin 2018, 22 milionë dollarë më pak se para pandemisë

Buxheti i shtetit ka arritur të mbledhë 27.3 miliardë lekë tatim nga fitimi i bizneseve përgjatë periudhës Janar-Tetor të këtij vitit. Dhe pse sipas treguesve zyrtarë të Ministrisë së Financave,  shifra është 0.5 për qind më shumë se plani dhe rreth 4.9 miliardë lekë më e lartë se një vit më parë, sërish nuk është në nivelin më të mirë të mundshëm.

Kjo pasi gjatë vitit 2020 më të cilin bëhet krahasimi i shifrave, për shkak të mbylljes totale të ekonomisë për një periudhë të caktuar kohe dhe uljes së konsumit, u aplikua edhe shtyrja e pagesës së taksave për një sërë kategorish si dhe shumë biznese u mbyllën për shkak se nuk i rezistuan masave të marra. Çka rrjedhimisht pasohet në fitime më të ulëta dhe të ardhura më të ulëta buxhetore nga ky zë.

Ndërkohë,  po ta krahasojmë me periudhën e parakrizës, pra me 10 mujorn 2019, të ardhurat nga fitimi i bizneseve, që tregojnë edhe performancën e ekonomike të sipërmarrjeve, janë 2.4 milardë lekë më të ulta apo rreth 22 milionë dollarë. Ndërsa në raport me vitin 2018, të ardhurat qendrojnë thuajse në të njëjtat nivele. Kjo tregon që pavarësisht rihapjes së ekonomisë, mosaplikimit të masave anticovid gjatë ktij viti, shfrytëzimit të plotë të sezonit turistik, sërish bizneset po kanë vështirësi në “ringritjen” e tyre.

Nga analiza e tatimit mbi fitimin sipas sektorëve rezulton sektori i shërbimit me rritje 24% krahasuar me 10-mujorin e vitit 2020, sektori i ndërtimit me rritje 47% krahasuar me të njëjtën periudhë të vitit të mëparshëm dhe sektori i tregtisë me një rritje 23% krahasuar me vitin e kaluar.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.