Bizneset, në treg të lirë energjie – Beqaj: Po e blejnë shtrenjtë nga OSHEE. Ahmeti: Ndryshime në ligj

Bizneset që kanë dalë në treg të lirë po e blejnë shtrenjtë energjinë elektrike nga OSHEE, që po ushtron funksionin e furnizuesit të mundësisë së fundit.

Gjatë diskutimeve në Komisionin e Veprimtarive Prodhuese, deputeti Ilir Beqaj tha se ndonëse aktualisht numri i këtyre bizneseve  është i ulët, me avancimin e liberalizimit të tregut, numri i tyre do të jetë i konsiderueshëm. Sipas Beqajt, metodologjia e ndryshuar nga ERE në maj të vitit të kaluar , ka rritur ndjeshëm dhe çmimin final për bizneset.

Por, sipas përfaqësuesve të ERE- në metodologji janë përfshirë kostot administrative që mbulohen nga OSHEE dhe fakti që energjia për këto kategori blihet në treg të lirë dhe jo nga KESH. Ndërkohë që, mundësia për të siguruar një çmim më të favorshëm energjie, përmes bursës së energjisë është ende larg për sa kohë jemi vetëm në hapat e miratimit të vendimit të qeverisë.  Megjithatë, bizneset duken të pa interesuara të sigurojnë vetë energjinë elektrike nga prodhuesit, ndonëse ky është një detyrim ligjor. Në këtë kuadër, kreu i Enti Rregullator të Energjisë, Ptreit Ahmeti thotë se po ndërmerren disa ndryshime ligjore, duke synuar heqjen e barrierave penguese apo uljen e çmimeve për këta abonentë.

Deri më tani vetëm 18 biznese të lidhur në tensionin 35 kv janë shkëputur nga OSHEE, ndërkohë që statistikat flasin për rreth 90 biznese të lidhur në këtë tension.  Por, kjo shifër është më e lartë, nëse marrim parasysh faktin se edhe rreth 6000 biznese të lidhur në 20 kv do të kenë detyrimin për ta siguruar vetë energjinë, duke vijuar më tej edhe me kategoritë e tjera, përveç abonentëve familjarë.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.