Bizneset, në vështirësi nga Pandemia – Sondazhi me kompanitë gjermane / 67% mund të largojnë punonjës. Të ulen taksat, të shtyhen pagesat

Bizneset gjermane që operojnë në Shqipëri janë prekur rëndë nga situata e shkaktuar nga Pandemia. Ato i konsiderojnë të pamjaftueshme masat e ndërmarra nga Qeveria, ndërkohë që paralajmërojnë rrezikun e largimit të punonjësve nga puna në rast se situate vazhdon të mbetet e njëjtë. Shoqata Gjermane e Industrisë dhe Tregtisë në Shqipëri ka kryer në muajin nëntor të vitit të shkuar një sondazh mes kompanive të anëtarësuara në këtë dhomë, të cilat e kanë parashikuar të zymtë situatën ekonomike në vend. 33% e kompanive që morën pjesë në sondazh presin që në harkun kohor të një viti situate të jetë jo e favorshme, ndërkohë që po 33% janë përgjigjur se presin që situate të mbetet e pandryshueshme.

43% e bizneseve gjermane presin që situate të përkeqësohet në sektorët ku operojnë për gjashtë muajt e ardhshëm, 40% presin që të mbetet e pandryshuar, ndërsa 17% që të përmirësohet.

Ndërkaq, pyetjes se sa gjatë presin që Pandemia të ndikojë në aktivitetin e Kompanisë, 45% e subjekteve janë përgjigjur rreth 12 muaj, 19% më shumë se 12 muaj, 14% presin që efektet të zgjasin pak muaj, ndërsa 22% janë shprehur se nuk janë në gjendje të bëjnë parashikime.

48% e bizneseve gjermane janë shprehur se kanë pasur efekte të lehta nga Pandemia, ndërsa 19% janë përgjigjur se kanë pasur efekte të ndjeshme.

Ndërkohë që përgjigjet janë mjaft pesimiste lidhur me numrin e të punësuarve në të ardhmen. Të pyetura nëse do të largojnë nga puna punonjës nëse situate mbetet e njëjtë, 67% e kompanive janë shprehur se po, do të largojnë punonjës.

Lidhur me ndihmën e ofruar nga qeveria për bizneset, 40% e kompanive janë shprehur se kanë qenë pak të vlefshme, ndërsa 38% e tyre i kanë konsideruar aspak të vlefshme.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.