Bizneset përplasen me IKMT – Mbi 20 kompani padi kundër Inspektoriatit në Gjykatë
Mbi 20 biznese kanë ngritur padi gjatë vitit 2017 kundër Inspektoriatit Kombëtar të Mbikëqyrjes së Territorit.
Shkak kryesor i padive janë gjobat e vendosura nga IKMT për shkelje të lejeve të ndërtimit, apo mosrespektim të përcaktimeve ligjore në sektorin e ndërtimit.
Disa prej gjobave në paditë e dërguara në Gjykatën Administrative të Tiranës, të zbardhura nga Televizioni SCAN, arrijnë vlerën e 300 mijë lekëve. Një pjesë tjetër e padive kërkojnë anulimin e vendimit të IKMT për prishjen e plotë apo të pjesshëm të objekteve.
Disa prej kompanive i kanë kërkuar gjykatës shfuqizimin e vendimin për pezullimi të aktivitetit të vendosur nga IKMT, apo të pezullimit të punimeve për ndërtimin e objekteve.
Sipas rregullores së vetë Inspektoriatit Kombëtar të Mbikëqyrjes së Territorit, përcaktohet si ndërtim në shkelje të ligjit çdo objekt që nuk zotëron një titull pronësie, që nuk është i përfshirë në procesin e legalizimit, apo nuk njihet përmes vendimeve të Agjencisë së Kthimit e Kompensimit të Pronave.
Po ashtu, në shkelje të ligjit konsiderohet çdo objekt që është i paregjistruar në Zyrat e Regjistrimit të Pasurive të paluajtshme, apo nuk ka një leje ndërtimi të lëshuar nga institucionet vendore, bashkitë apo komunat.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.