Bizneset pranë shkollave nën shënjestrën e AKU – Nikolla: E gjithë vëmendja tek nxënësit edhe në aspektin e sigurisë ushqimore
Krahas subjekteve turistike dhe restoranteve të dasmave, nën shënjestrën e Autoritet Kombëtar të Ushqimit do të jene edhe subjektet që ushtrojnë aktivitetin pranë institucioneve shkollore. Trupa inspektuese e AKU kanë filluar punën në terren për inspektimin e këtyre subjekteve me qëllim rritjen e sigurisë ushqimore.
Gjatë inspektimeve në disa subjekte të qytetit të Lezhës, ka qenë e pranishme edhe ministrja e Arsimit, Sportit dhe Rinisë, Lindita Nikolla, e shoqëruar nga zëvendësministrja e Bujqësisë dhe kreu i Agjencisë Kombëtare të Ushqimit. Respektimi i kushteve sipas rregullave dhe kujdesi ndaj produkteve që tregtojnë kanë qenë edhe kërkesat kryesore të tyre ndaj administruesve të bizneseve.
“Shkolla po fillon dhe gjithë vëmendja është tek nxënësit edhe në një aspekt tjetër që lidhet me sigurinë ushqimore. Ndaj në cilësinë e ministres do doja të falënderoja Autoritetin Kombëtar të Ushqimit të cilët këto ditë përfundojnë inspektimet e para te të gjithë standardeve të bizneseve që operojnë rrotull shkollave. Do të jetë një vëmendje e posaçme edhe në ditët kur fillon shkolla në mënyrë që ne të kemi sigurinë ushqimore për të gjithë gamën e asortimenteve që këto biznese ofrojnë për nxënësit dhe jo vetëm,” tha Nikolla.
Ndërkohë, zv/e Bujqësisë, Ermira Gjeçi tha se plani i AKU-së për inspektimin e operatorëve të biznesit ushqimor pranë shkollave pritet të finalizohet në fillim të muajit tetor.
“Është një operacion që pritet të përfundojë në fillim të tetorit dhe do të vijojë gjatë gjithë vitit 2018-2019,” deklaroi Gjeçi
Inspektimet në terren u kryen në disa subjekte pranë shkollave “Besëlidhja”, “Gjergj Kastrioti” dhe “Hydajet Lezha” të cilat ofrojnë produkte të cilat konsumohen nga fëmijët gjatë orëve të pushimit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.