Bizneset shqiptare më të ndershmet në rajon? – Anketa e Rcc: Deklarojnë se raportojnë 93% të shitjeve dhe 96% të punonjësve
Institucione të ndryshme ndërkombëtare e vlerësojnë si shumë të lartë shkallën e asaj që njihet si ekonomia gri, pra ekonomia informale, deri në masën 40% të ekonomisë sonë. Por çfarë thonë vetë bizneset për një çështje të tillë? Përgjigja vjen nga Barometri i Ballkanit 2020. Bizneset shqiptare mendojnë se janë më të ndershmet në rajon.
Të pyetur se sa përqind të shitjeve vjetore mendojnë ata se bizneset në zonën pranë tyre raportojnë për qëllime taksash, 87% i përgjigjen me 76%-100%. Mesatarja ndërkohë fiksohet në 93%, çka do të those se bizneset shqiptare mendojnë se 93% e shitjeve raportohen tek autoritetet, e për rrjedhojë edhe taksohen, çka do të thotë se sipas tyre, informaliteti në ekonominë shqiptare qëndron në vetëm 7%, më i ulti në rajon.
Mesatarja e Ballkanit Perëndimor fiksohet në 88%. Kjo normë ngjitet edhe më tej kur pyeten për pagat e raportuara, në 95%, apo për punonjësit e regjistruar, në 96%. Edhe në këto dy raste, bizneset shqiptare mendojnë se janë më të ndershmet në rajon.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.