Biznesi, 8 ndryshime në 9 muaj – Sipërmarrja, përballë reformave të reja fiskale
Një ndër shqetësimet kryesore që sipërmarrja vendase dhe e huaj në Shqipëri ka ngritur në mënyrë të përhershme , është ndryshueshmëria e politikave fiskale dhe e legjislacionit në mënyrë të shpeshtë dhe të vrullshme. Pavarësisht se vetë Ministria e Financave është zotuar se do të arrijë të sigurojë qëndrueshmëri në këtë drejtim, në mënyrë që biznesi të mos ketë frikë të investojë, apo të bëjë plane të qendrueshme, sërish këtij të fundit i është dashur të përballet me një sërë “stuhish” dhe ndryshimesh.
Një nga këto ishte paketa “Moneyval” që kishte në përbërje ndryshime në 5 ligje dhe që synon siguri më të shtuar dhe rrezik më të ulët nga terrorizmi; Reduktim të informalitetit në ekonomi; Reduktim të përdorimit të parasë fizike; Siguri të shtuar financiare dhe bankare,; Reduktim të ndikimit të praktikave të pastrimit të parave dhe për pasojë reduktim të efekteve negative në jetën ekonomike dhe sociale të secilit prej nesh. Për biznesin u përcaktuan detyrime dhe penalitete specifike në rastet e mospërmbushjes së tyre.
Po ashtu, ndryshoi ligji për koncesionet dhe partneritetin publik- privat ku u vendosën rregulla të reja dhe u hoq si koncepte oferta e pakërkuar në infrastrukturë. Fiskalizmi, ishte një tjetër ndryshim në “jetën” e bizneseve, që do të jetë një proces sa i vështirë aq edhe sfidues kundër informalitetit. Ndërsa në mesin e muajit shtator priten sërish ndryshime në ligjin e Procedurave Tatimore, sa i përket penaliteteve që do të ndërmerren ndaj sipërmarrjes në rast se kapen në shkelje.
Ndryshimet e ligjeve në 9 muaj
- Ndryshime në ligjin “Për koncesionet dhe Partneritetin Publik-Privat”
- Ligji “Për parandalimin e pastrimit të parave dhe financimit të terrorizmit”
- Ligji “Për masat kundër financimit të terrorizmit”
- Ligji “Për regjistrimin e biznesit”
- Ligji “Për procedurat tatimore në RSH”
- Ligji “Për administrimin e pasurive të sekuestruara e të konfiskuara”
- Projektligjin “Për Faturën dhe Sistemin e Monitorimit të Qarkullimit”
- Ndryshime në ligjin për “Procedurat tatimore në Republikën e Shqipërisë
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.