Biznesi i vogël – Ahmetaj: Sportel të dedikuar asistence, informimi dhe trajnimi në të gjithë Shqipërinë
Bizneset e vogla të cilat do të përfshihen në skemën e TVSH-së nga 1 prilli 2018 do të kenë një sportel të dedikuar asistence, informimi dhe trajnimi. Lajmin e ka bërë të ditur Ministri i Financave dhe Ekonomisë, Arben Ahmetaj gjatë një inspektimi në Drejtorinë Rajonale të Tatimeve në Korçë.
”Për bizneset e vegjël që do të përfshihen në skemën e deklarimit të TVSH, një sportel i dedikuar asistence, informimi dhe trajnimi, në Korçë dhe në çdo zyrë të shërbimit të tatimpaguesve, në të gjithë Shqipërinë.”
Ahmetaj vuri theksin te radha dhe pritja e bizneseve, të cilat sipas tij janë reduktuar në mënyrë drastike. Po ashtu, shtoi më tej se gjenerohen online më shumë se 1200 vërtetime në muaj si rezultat i reformës së deregulimit.
“Mbi 1200 vërtetime në muaj që më parë ofroheshin vetëm të printuara në letër, tani falë reformës së deregulimit, gjenerohen lehtësisht online përmes platformës e-Albania. Numri i veprimeve në sportel është ulur nga 1200 në vetëm 200 në muaj.”
Bizneset e vogla duhet gjithashtu të dorëzojnë edhe një “Fletë inventari” për gjendjen e mallrave dhe materialeve të blera me TVSH.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.