Biznesi s`di të ankohet – Raporti i Gushtit, mesatarisht 2 ankesa në ditë në të gjithë republikën
Ministria për Mbrojtjen e Sipërmarrjes ka bërë publik raportin e 12-të të ankesave të biznesit. Ajo që vihet re nga ky raport është numri ende mjaft i vogël i ankesave, vetëm 31 të tilla gjatë Gushtit, mesatarisht nga një ankesë në ditë që i është dhënë zgjidhje e plotë ose e pjesshme.
Ndër këto 31 ankesa, vetëm 14 prej tyre i është dhënë zgjidhje, pra edhe më pak se gjysma, ndërkohë që pjesa tjetër në shumicën e rasteve janë trajtuar me një përgjigje. Në total ndërkohë, kërkesat/ankesat ndaj ministrisë gjatë Gushtit kanë qenë 70.
Nga lista e ankesave të bëra publike nga Ministria në raportin e 12-të, bie në sy që një pjesë e madhe i drejtohen institucioneve si hetimi tatimor apo Qendra Kombëtare e Biznesit.
Në disa raste, ankesat i drejtohen sistemit online, pra mos-funksionimit të tij, si në rastin e QKB apo e-albania. Në një njoftim të fundit ndërkohë, Berzh, flet për mbështetje shtesë ndaj ministrisë së mbrojtjes së sipërmarrjes, sidomos me kapacitete njerëzore, për të nxitur edhe më tej punën e kësaj ministrie si dhe përmirësimin e klimës së biznesit.
Ndër të tjera, Ministria në këtë raport flet edhe për turizmin në vendin tonë, duke raportuar se numri i bizneseve të reja në qarqet bregdetare u rrit me 21%, ndërkohë që xhiro e biznesit në Vlorë, Durrës, Shkodër dhe Lezhë u rrit me 12%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.