Biznesi, Shqipëria jashtë Europës – Ndarja e ndërmarrjeve sipas punësimit, jemi rast unikal

Shqipëria është shumë larg Europës kur bëhet fjalë për modelin e biznesit dhe modelin e punësimit. Të dhënat e fundit të Eurostat ilustrojnë se si janë të ndarë bizneset në vendet e unionit, sipas punësimit. Po t`i krahasojmë këto të dhëna me ato të institutit të statistikave në vendin tonë, panorama është mjaft e qartë.

Vendi ku të punësuarit në ndërmarrjet e vogla është më i madhë është Italia, ku këto ndërmarrje zënë 66% të tregut të punës. Për të ilustruar sesa larg Europës është Shqipëria në këtë drejtim, mjafton të themi se në vendin tonë kjo përqindje fiksohet në 90%.

Kur bëhet fjalë për peshën e ndërmarrjeve të mesme, Italia mban po ashtu vendin e fundit, me vetëm 12% të totalit në tregun e punës. Për Shqipërinë kjo normë zbret në 8.8%, më keq se çdo vend tjetër Europian. Edhe më dramatike është situata kur flasim për ndërmarrjet e mëdha.

Në Shqipëri, këto ndërmarrje përfaqësohen në tregun e punës me vetëm 1.2% të totalit. Në vende si Mbretëria e Bashkuar, kjo normë fiksohet në 46.5%.

Në Bashkimin Europian, vendi më i prapambetur në këtë drejtim është Malta, me një normë në 20%, ç`ka tregon edhe njëherë diferencën që ka Shqipëria me Europën edhe në drejtim të modelit të biznesit.

Përqendrimi i tregut të punës te ndërmarrjet e vogla në masën 90% është rrjedhojë e drejtpërdrejtë e mungesës së industrisë në vendin tonë. Kështu, në drejtim të modelit të biznesit, Shqipëria është tërësisht jashtë Europës.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.