Biznesi “shtrëngoi rripin”, Qeveria “zgjidhi qesen” – 2020, hendeku kursime-investime në 1.7% të PBB për privatin, -11.7% për shtetin

Sektori privat dhe ai shtetëror kanë reaguar në mënyra krejt të ndryshme ndaj problematikave që solli viti 2020, i ndikuar tërësisht nga Pandemia Covid 19. Një analizë e Bankës së Shqipërisë mbi hendekun kursime investime zbardh përmirësim për sektorin privat e tkurrje të fortë për atë publik.

Më specifikisht, hendeku kursime-investime i sektorit privat u vlerësua në 1.7% të PBB-së nominale për tremujorin e katërt të vitit 2020, me një përmirësim 5.1 pikë përqindje krahasuar me një vit më parë. Raporti i investimeve private ndaj PBB-së nominale vlerësohet në nivelin 15.9%, rreth 1.8 pikë përqindje më të ulëta se një vit më parë. Nga ana tjetër, kursimet private ndaj PBB-së nominale vlerësohen në nivelin 17.6%, rreth 3.2 pikë përqindje më të larta se një vit më parë.

Ndërkaq, Hendeku publik rezultoi -11.7% ndaj PBB-së, i thelluar 5.0 pikë përqindje krahasuar me  një  vit  më  parë.  Kursimet  publike  vlerësohen  në  nivelin  0.9%  ndaj  PBB-së  nominale, me një pakësim 1.0 pikë përqindje në terma vjetorë. Investimet publike u vlerësuan në 12.6% ndaj PBB-së nominale, rreth 4.0 pikë përqindje më të larta krahasuar me një vit më parë. Rritja e lartë e investimeve publike ka qenë faktori kryesor pas thellimit të hendekut publik.

Në total, Raporti  i  investimeve  kombëtare  ndaj  PBB-së  është  rritur  me  2.2  pikë  përqindje  në terma vjetorë. Raporti i kursimeve kombëtare ndaj PBB-së nominale është rritur me 2.3 pikë përqindje. Kontributi lehtësisht më i lehtë i kursimeve kombëtare, ka shkaktuar edhe rënien me 0.1% të raportit të deficitit korrent ndaj PBB-së krahasuar me një vit më parë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.