Biznesmenët “sfiduan” virusin – Vizitat me qëllime profesionale, të vetmet që janë rritur në 2020
Pandemia nuk ka ndalur vizitat profesionale në vend. Madje, në 10 mujorin e vitit janë rritur hyrjet e shtetasve të huaj në Shqipëri, për këtë qëllim.
Sipas raportit më të fundit të Institutit të Statistikave, në periudhën janar – tetor 2020, hyrjet në vend të shtetasve për arsye biznesi dhe profesionale janë rritur me 12.1%, krahasuar me të njëjtën periudhë të një viti më parë.
Shifrat e Instat tregojnë se në 10 mujorin e vitit 2019, në total numri i vizitave me qëllime biznesi ka qenë 83 mijë e 948. Ndërkaq, për të njëjtën periudhë të këtij viti, kundrejt të gjitha masave, bllokimeve dhe kufizime për shkak të pandemisë së COVID – 19, numri i vizitave me qëllime biznesi dhe profesionale ka shkuar 94 mijë e 67. Thënë ndryshe, 10 mijë e 119 “hyrje biznesi” më shumë në vend.
Ndër të tjera, në tetor ka vijuar edhe më ky trend, duke ndjerë një rritje me 15.6%, krahasuar me tetorin e vitit 2019. Sipas shifrave të Instat, në tetor 2019, hyrjet për qëllime biznesi rezultojnë 10 mijë e 737, ndërsa në tetor 2020, “check-in” – et profesionale kanë shkuar në 12 mijë e 409. Saktësisht, 1 mijë e 672 më shumë.
Në fakt, nga pasqyra e të gjithë zërave të qëllimeve të hyrjeve të huaja në Shqipëri në periudhën janar – tetor 2020, i vetmi zë që nuk është dëmtuar nga COVID – 19 është ai i arsyeve profesionale. Madje, i vetmi zë që rezulton në rritje, krahasuar me 10 mujorin e vitit paraardhës.
Referuar Instat, në periudhën janar – tetor 2020, hyrjet e shtetasve të huaj me qëllime personale kanë rënë me 61.2%, hyrjet për pushime apo vizita kanë rënë me 61.1%, ato fetare me 65.6%, ndërsa udhëtimet tranzit kanë rënë me 64.9% (krahasuar me janar – tetor 2019).
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.