BKH, vjen “makina e së vërtetës” – Yuri Kim: Armë e re në luftën kundër korrupsionit. Lleshaj: diagnostikojmë korrupsionin
Departamenti Amerikan i Shtetit i ka dhuruar Ministrisë së Brendshme 5 pajisjet e para poligrafike, të njohura gjerësisht si makina e së vërtetës, duke trajnuar edhe 5 ekspertët e parë në përdorimin e tyre. Pajisjet do të përdoren fillimisht për rekrutimin e 60 hetuesve të Byrosë Kombëtare të Hetimit, ndërkohë që në vijim do të shfrytëzohen edhe për Vetting-un në Policinë e Shtetit. 5 ekspertët e parë shqiptarë u përshëndetën nga Ambasadorja Amerikane në Tiranë, e cila e quajti skuadrën e sapoformuar të poligrafit një armë të re të drejtësisë në luftën kundër krimit të organizuar e korrupsionit. Ajo përsëriti se kjo është një provë tjetër që Shtetet e Bashkuara janë të vendosura të qëndrojnë afër Shqipërisë në betejën për reformën në drejtësi.
Ministri i Brendshëm Sandër Lleshaj e quajti ngritjen e njësisë së poligrafit ditë historike në luftën kundër korrupsionit e krimit të organizuar. Ai u ndal edhe te masat e Qeverisë të njohura tashmë si anti KÇK, duke e quajtur një përgjegjësi të madhe ndaj qytetarëve që synon shterimin e financave, konfiskimin e shkatërrimin e biznesit të krimit.
Trajnimi i 5 ekspertëve shqiptarë u shtri në disa fusha, si në 400 orë dhe u krye nga Kreu i Shoqatës Amerikane të Poligrafit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.