Blerina Gjylameti në “60 minuta”: Reforma Zgjedhore përfundon në fund të majit!

Në RTV SCAN ka filluar emisioni më i ri, “60 minuta’, format i famshëm televiziv amerikan i krijuar prej vitit 1968. Emisioni, që do të transmetohet çdo të martë e çdo të premte në orën 20:00, angazhohet për trajtimin e një dimensioni të thelluar politik, e pikërisht për këtë, i dedikohet temave më aktuale të politikës shqiptare.

Këtë puntatë të parë, “60 minuta” trajtoi debatet e nxehta për Teatrin Kombëtar dhe Reformën Zgjedhore, si reforma kryesore që do shënjojë jo vetëm vitin 2020 por dhe më tej, terrenin politik në Shqipëri.

E ftuar në studio, Blerina Gjylameti, deputete e PS dhe njëkohësisht anëtare e Këshillit të Posaçëm të Reformës Zgjedhore, e pyetur nga Arbër Hitaj, moderator i emisionit, është shprehur se Reforma, pavarësisht vonesave artificiale apo jo, do të mbyllet brenda afatit, pra në fund të majit.

Ajo është shprehur lidhur me vonesat që ka shkaktuar njëherë tërmeti, pastaj pandemia, por dhe mos-dakordësitë e opozitës, dhe ka thënë se të gjitha këto nuk do pengojnë kryerjen e detyrës së Komisionit të Posaçëm brenda afatit kohor përcaktuar nga Kuvendi.

Më tej, Znj. Gjylameti ka thënë se janë dakordësuar shumica e rekomandimeve të OSBE/ODHIR, megjithatë ende nuk gjendet një konsensus lidhur me reformën për administratën zgjedhore apo kolegjin zgjedhor.

Për më shumë, ndiqni emisionin “60 minuta”, në kanalin dhe rrjetet sociale të RTV-SCAN.

Dosti Banushi – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.