BMW, në performancë të fortë / Nuk ndikohet nga kriza e çipeve, pret të arrijë objektivat e vitit 2021

BMW qëndron në kursin e arritjes së objektivave për fitimin në vitin 2021, pavarësisht rritjes së kostos së lëndëve të para, sipas deklaratës së kompanisë, që shtoi se i është shmangur deri më tani problemeve me mungesën e çipeve që kanë goditur rivalë si Volkswagen.  Shefi i Volkswagen Herbert Diess, tha gjatë Javës se prodhuesi më i madh i makinave në Evropë ndodhet në periudhë krize, prej mungesës së çipeve, që pritet të godasë fitimet në tremujorin e dytë.

Ford deklaroi se i njëjti problem, mund të përgjysmojë prodhimin në tremujorin e dytë.  BMW njihet për marrëdhëniet e forta me furintorët dhe ka bashkëpunuar me ta për të shmangur ndërprerjet. Përveç mbylljes së përkohshme të prodhimit të markës Mini në Mbretërinë e Bashkuar, kompania nuk është ndikuar.  BMW deklaroi se shitjet e makinave elektrike më shumë se u dyfishuan në tremujorin e parë, periudhë ku përfitoi edhe nga çmimet më të larta dhe kërkesa e fortë kineze. BMW kishte raportuar një rritje me 370% të fitimit përpara taksave, ndërkohë që u rimëkëmb më fort se ç’pritej nga pandemia.   Shitjet në Kinë më shumë se u dyfishuan në tremujorin e parë, krahasuar me të njëjtën periudhë një vit më parë.  Rimëkëmbja e kërkesës nga konsumatorët kinezë në gjysmën e dytë të vitit ka ndihmuar BMW dhe rivalë gjermanë si Volkswagen dhe Damiler që të publikojnë fitime të qëndrueshme për 2020, pavarësisht pandemisë botërore. BMW raportoi rritje edhe në rajone të tjera gjatë T1, përfshirë 17.4% rritje në Amerikën e Veriut, nxitur nga kërkesa e fortë në SHBA.  “Tremujori i parë tregon se modeli ynë i biznesit në botë është i suksesshëm, edhe në periudhë të krizës”- the ekzekutivi i BMW, Oliver Zipse, duke shtuar se pritet të arrihen objektivat e fitimit të qëndrueshëm.   Kompania shtoi se pret të ketë 2 milionë makina tërësisht elektrike në qarkullim deri në vitin 2025.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.