Bolsonaro fiton raundin e parë – Brazili anon nga e djathta ekstreme prej krimit dhe korrupsionit
Kongresmeni i të djathtës ekstreme dhe ish ushtaraku, Jair Bolsonaro, fitoi thuajse gjysmën e votave në raundin e parë të zgjedhjeve presidenciale në Brazil, ndërkohë që votuesit janë irrituar nga korrupsioni në vendin më të madh të Amerikës Latine.
Bolsonaro do të përballet tashmë me Fernando Haddad, ish kryebashkiakun e Sao Paulo, në raundin e dytë të zgjedhjeve më datë 28 Tetor.
Bolsonaro, që është quajtur “Trumpi Tropikal” nga analistët për shkak të axhendës së tij nacionaliste, ka marrë fuqi nga irritimi i popullit drejt partive tradicionale të përfshira në skandale.
Premtimi i tij për të ndaluar ashpër krimin, ka marrë mbështetje nga votuesit në vendin me popullsinë e 5 më të madhe në botë, që ka regjistruar një numër rekord të vdekjeve të dhunshme në vitin 2017 prej 63,880.
Bolsonaro ka premtuar se do të rikthejë kontrollet e armëve dhe do ta bëjë më të lehtë për policinë që të qëllojë. Bolsonaro fitoi 46.3% të votave, shumë sipër rezultatit të Haddad prej 29%, por më pak se sa duhej për të fituar mazhorancën dhe shmangur raundin e dytë të zgjedhjeve.
Partia Social Liberale e Bolsonaro, dikur fare e vogël, është kthyer në fuqinë e dytë më të madhe në Kongres, duke i dhënë një nxitje axhendës së tij për të ulur taksat dhe rritur rolin e shtetit në ekonomi.
Ndërkohë që asnjë parti kryesore nuk i ka dhënë mbështetje dhe financimi ka qenë tejet i ulët, Bolsonaro ka përdorur në mënyrë eficente mediat sociale gjatë fushatës. Ai fitoi popularitet pas goditjes me thikë që mori një muaj më parë, gjë që e mbajti larg fushatës.
“Kjo ishte një fitore e madhe duke marrë parasysh se nuk kemi pasur fare hapësirë televizive, një parti që është ende shumë e vogël dhe pa financim për fushatë dhe duke marrë gjithashtu parasysh që kam qenë në spital për 30 ditë”, tha ai në një video në mediat sociale.
Në komentet e para publike, Bolsonaro ka premtuar të reduktojë përmasën e administratës publike, shkurtojë kabinetin në vetëm 15 ministra, ulë taksat dhe privatizojë apo mbyllë shumë kompani. Haddad, nga ana tjetër, i bëri thirrje brazilianëve që të bashkohen me të, pasi rrezikohet demokracia ende e re në Brazil. Ish-presidenti Lula, u përjashtua nga gara pas dënimit me 12 vite burgim, për akuza të korrupsionit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.