Bolsonaro sulmon mediat – “Brazili do ndërpresë financimin për mediat që gënjejnë”

Presidenti i zgjedhur i Brazilit, Jair Bolsonaro, ka ripërsëritur premtimet që ka bërë gjatë fushatës, duke bërë thirrje për ligje më të lehta për blerjen e armëve, kërkuar që gjykatësi me profilin më të lartë anti-korrupsion ti bashkohet qeverisë së tij dhe premtuar që të ndërpresë financimin qeveritar për mediat që “gënjejnë”.  Bolsonaro, që fitoi 55% të votave ditën e Dielë dhe që do të betohet më datë 1 Janar,  tha se nuk do të humbasë kohë në ndjekjen e axhendës së tij.

“Mjaft me gënjeshtra, mjaft me lajme të rreme.  Unë dua të qeveris për të gjithë Brazilin, jo vetëm për ata që më votuan.  Thuajse të gjitha lajmet erdhën nga Folha de Sao Paolo,  që thoshte se unë jam punësuar nga kompanitë jashtë Brazilit, që të krijoj një fushatë të gënjeshtrave.  Përsëri, lajme të rreme nga e përditshmja e Sao Paolos, fatkeqsisht”, tha Bolsonaro. 

Bolsonaro kërkon që Segio Moro, i cili ka mbikëqyrur skandalin e korrupsionit në vend dhe ka dënuar ish presidentin Luiz Inacio Lula da Silva,  t’i bashkohet qeverisë së tij si Ministër i Drejtësisë.

“Ai është një burrë që duhet t’i njihet puna. Unë kërkoj ta ftoj Sergio Moro në Ministrinë e Drejtësisë apo në Gjykatën e lartë.  Ai ka një historik pozitiv në luftën kundër korrupsionit”, shtoi ai.

Në nisje të javës, Bolsonaro tha në një intervistë për TV Globo, se ai do të heqë fondet e reklamimit të qeverisë që shkojnë drejt mediave që gënjejnë.  Gjatë fushatës së tij, lideri i ekstremit të djathtë imitoi strategjinë e Donald Trump në përballjen agresive me mediat. Në veçanti, ai shënjestroi TV Globo dhe të përditshmen më të madhe të Brazilit, Folha de Sao Paolo.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.