Bolsonaro, sytë tek ilaçi “çudibërës”. Shpreson se hidroksiklorokina do shpëtojë Brazilin dhe jetën e tij
Presidenti i Brazilit, Jair Bolsonaro ka vendosur të gjithë shpresat tek hidroksiklorokina për të ndihmuar vendin e goditur rëndë nga koronavirusi. Ai i ka bërë thirrje qeverisë së tij që ta disponojë ilaçin e malarias gjerësisht dhe ka inkurajuar brazilianët që ta marrin, si për ta parandaluar dhe për ta trajtuar sëmundjen. Populisti i djathtë deklaroi gjatë javës se është testuar pozitiv për sëmundjen dhe po merr hidroksiklorokinën. Bolsonaro tha në një intervistë se ka marrë 2 dozat fillestare, së bashku me antibiotikun azitromicin dhe është ndjerë menjëherë më mirë. Ai tha se është penduar që nuk i ka marrë më herët.
“Nëse do ta kisha marrë hidroksiklorokinën për ta parandaluar, do të ishe ende në punë dhe jo në karantinë”, tha Bolsonaro. Më vonë, ai piu një pilulë të tretë në video dhe shtoi se është në dijeni për trajtimet e tjera, por theksoi se asnjë prej tyre nuk është vëretuar se bën punë. “Unë besoj tek hidroksiklorokina, po ju”, tha Bolsonaro. Infektimi i presidentit përbën një simbol të reagimit të dështuar të qeverisë së tij ndaj pandemisë. Më shumë se 1.7 milionë njerëz në Brazil janë testuar pozitiv dhe mbi 68,000 kanë vdekur.
Vetëm Shtetet e Bashkuara e kalojnë për performancë negative. Një kritik i masave të karantinës, Bolsonaro, ka kritikuar publikisht maskat dhe e ka quajtur koronavirusin një “grip të vogël”. Ai ka vendosur shpresat tek hidroksiklorokina dhe klorokina, duke i kthyer në armën kryesore për të luftuar virusin.
Dy mjekimet përdoren zakonisht kundër malarias, ndërsa hidroksiklorokina përdoret edhe për të trajtuar sëmundje të caktuara autoimmune. Megjithatë, janë shtuar provat se këto barna nuk sjellin përfitime tek pacientët e shtruar në spitale. Administrata e Barnave dhe Ushqimeve në SHBA hoqi në muajin Qershor përdorimin e emergent të të 2 ilaçeve, duke thënë se nuk janë efektiv në trajtimin e pacientëve.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.