Bonus prej 170 eurosh për policinë dhe ushtrinë – Putin miraton ligjin e ‘kushtueshëm’ para zgjedhjeve parlamentare

Presidenti rus Vladimir Putin ka miratuar pagesat e njëhershme për zyrtarët policorë dhe ushtarakë. Dekreti do të japë shpërblime prej 15,000 rubla (170 euro) për të gjithë personelin e ushtrisë dhe zbatimit të ligjit në shtator, sipas Kremlinit.

Dekreti presidencial tha se pagesat ishin krijuar për të mbrojtur “nevojat sociale” të punonjësve të urgjencës. Por kritikët thonë se masa është projektuar për të inkurajuar ushtrinë të votojë për partinë qeverisëse të Putinit, Rusia e Bashkuar përpara zgjedhjeve parlamentare të muajit të ardhshëm.

Javën e kaluar, një bonus i ngjashëm i njëhershëm prej 10,000 rubla (110 €) iu ofrua pensionistëve. Rusia ka rreth 42 milionë pensionistë dhe të paktën 1.7 milionë policë, ushtri dhe roje kombëtare. Të dy grupet tradicionalisht votojnë për Rusinë e Bashkuar, por partia po përballet me kritika të forta para kalendarit të tensionuar të zgjedhjeve.

Qytetarët rusë kanë shprehur zemërimin ndaj rënies së standardit të jetesës në vend që nga viti 2014, shoqëruar me një rritje të çmimeve të konsumit. Rusia e Bashkuar aktualisht po mbledh 27.3% të votave, sipas institutit Vtsiom që është pranë qeverisë. Ndërkohë, nivelet e besimit në Vladimir Putin vlerësohen në 62.2%.

Kundërshtarët e Kremlinit, si dhe mediat e pavarura, janë përballur me një ‘goditje’ nga autoritetet në prag të zgjedhjeve.

Rusia gjithashtu ka lëvizur për të çmontuar lëvizjen e kundërshtarit të burgosur Alexei Navalny, duke i klasifikuar organizatat e tij si “ekstremiste” dhe duke bllokuar disa faqe në internet. Shumë nga aleatët dhe mbështetësit e ngushtë të Navalny janë përjashtuar nga zgjedhjet ose janë detyruar në mërgim.

Disa media të pavarura dhe OJQ janë klasifikuar kohët e fundit si “agjentë të huaj”, një status i diskutueshëm që ndërlikon seriozisht operacionet e tyre. (EN)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.