Bonusi 2.5 mln lekë – Kirurgu i parë shkon në Spitalin e Kukësit

Bonusi i parë prej 2.5 milionë lekë jepet për një mjek kirurg i cili ka pranuar që të shkojë në spitalin e Kukësit.Dr Novruz Bare ka realizuar edhe operacionin e parë  në këtë qytet i cili ka shkuar me sukses.

“Sapo kryem një operacion. Shkoi me sukses. Unë erdha në kuadër të thirrjes që bëri ministrja e Shëndetësisë. E kisha dhe për detyrë humanitare, sigurisht, jam mjek dhe do të përgjigjem,” u shpreh Dr. Novruz Bare.

“Për herë të parë në spitalin e Kukësit vjen nëpërmjet programit të bonusit, me masën e re të bonusit që miratuam në qeveri me 250 mijë lekë,  një mjek kirurg i dedikuar për spitalin e Kukësit që do të mbulojë të gjitha kirurgjitë dhe do të qëndrojë 24/7 on call për të gjitha problemet kirurgjikale që mund të kenë banorët e Kukësit, por dhe të Hasit dhe të Tropojës, për të kryer të gjitha ndërhyrjet kirurgjikale në këtë spital,” tha ministrja Ogerta Manastirliu.

Kryeministri Edi Rama ka vizituar spitalin e qytetit të Kukësit  për të parë nga afër funksionimin e patronazhimit  i cili pritet të vijojë për afro një vit, kur do të përfundojnë dhe 300 specializantët e parë, të cilët do plotësojnë vakumet në të gjithë sistemin.

 “Tani do vijë Tirana këtu dhe do shkojë Tirana në të gjitha spitalet ku ka nevojë për mjekë specialistë, sepse deri në janar 2019 na duhet të bëjmë këtë gjë. Pastaj do vijnë mjekët specialistë që do jenë full time çdo ditë,” deklaroi Kryeministri Edi Rama.

Sistemi i patronazhimit është një ndër programet më të reja të shëndetësisë për fuqizimin e spitaleve rajonale dhe spitaleve bashkiake. Realizohet nga mjekët e spitaleve universitare të Tiranës në spitale rajonale. Praktikisht kemi marrë në patronazh spitalin rajonal të Kukësit, Dibrës, Korçës, Gjirokastrës, Vlorës, Fierit dhe Beratit.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.