“Boom” aplikimesh për energjinë e erës. Investitorët shfaqin interes për impiante eolike, 3 aplikime të tjera për centrale 3 MW
Kompanitë po rrisin interesin për investime të prodhimit të energjisë nga era, teksa së fundmi 3 shoqëri kanë depozituar aplikime pranë Ministrisë së Infrastrukturës dhe Energjisë. Të tre kërkesat parashikojnë ndërtimin e impanteve eolike me kapacitet 3 MW, në zonën e Karaburunit, në Qarkun e Vlorës. Ndërkohë që, së fundmi u depozituan edhe 2 aplikime të tjerë për zonën e Semanit dhe Tropojës në Fier.
Aktualisht, në vendin tonë nuk ka asnjë impiant të prodhimit të energjisë nga era, ndërkohë që nevoja për diversifikimin e burimeve të prodhimit të energjisë është e madhe, për shkak të varësisë nga kushtet hidrike. Në fakt, Enti Rregullator i Energjisë ka licencuar disa kompani për kryerjen e kësaj veprimtarie, por ndërtimi në terren nuk ka nisur ende. ERE ndërmori edhe një proces monitorimi në terren për këtë çështje, por situata e krijuara nga COVID-19 e shtyu për një moment të dytë, çka bën që ende të mos kemi një situatë të qartë se çfarë po ndodh me vonesat në ndërtimin e këtyre impianteve.
Ndërkaq, ERE parashikon që procesi i monitorimit, hartimi i konkluzioneve përkatëse dhe marrja e vendimeve nga ERE pritet të mbyllet përgjatë vitit 2020. Me përfundimin e këtij monitorimi nga ERE do të vlerësohen në analizë të gjetjeve të monitorimit edhe shtyrja apo jo e afateve për plotësimin e secilës prej kushteve të këtyre liçensave nga subjektet respektive.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.