Borxhet ndaj kompanive trefishohen pas 25 prillit – Nga 20 milionë dollarë në mars, detyrimet shtetërore për investime shkuan 60 milionë në shtator
Detyrimet e prapambetura të Qeverisë, të cilat janë një problem që përsëritet vit pas viti, gjatë 2021-shit janë ulu dhe janë rritur në një trajektore që ka ndjekur besnikërisht zgjedhjet e 25 prillit. Ndërsa kanë rënë në nivele të dukshme gjatë tremujorit të parë dhe të dytë ato kanë kërcyer me dhjetëra miliona dollarë në fund të shtatorit.
Ministria e Financave raporton se ato kanë rezultuar në nivelin 19.7 miliardë lekë, apo rreth 197 milionë dollarë në fund të shtatorit, ndërkohë që në qershor ato ishin shumë më pak, 18 miliardë lekë afërisht 180 milionë dollarë. Në këtë mënyrë, në shtator, niveli I detyrimeve të prapambetura të Qeverisë kthehet në nivelet e periudhës parazgjedhore, duke parë se në mars totali I tyre arrinte në afërisht 20 miliardë lekë afërisht 200 milionë dollarë.
Ulja fortë e detyrimeve të prapambetura u shënua gjatë periudhës parazgjedhore, kur Qeveria shleu thuajse tërësisht rimbursimet e TVSH-së ndaj bizneseve. Në fakt, TVSH-ja e parimbursuar në fund të qershorit rezulton në nivele shumë të ulëta historike, afërsisht 4.5 milionë dollarë.
Edhe më domethënëse janë luhatjet e detyrimeve të papaguara të qeverisjes qendrore. Ato janë shtuar me rreth 20 milionë dollarë nga qershori në shtator, nga 97 milionë dollarë në fund të qershorit, në thuajse 120 milionë dollarë në fund të shtatorit.
Thuajse e gjitha shtesa e këtij borxhi I takon zërit të investimeve, I cili është edhe më I larti në treguesit e detyrimeve të papaguara të qeverisjes qendrore. Institucionet qendrore në shtator kanë trefishuar detyrimet e prapambetura në raport me marsin e këtij viti: nga rreth 20 milionë dollarë në mars, ato rezultojnë afërisht 40 milionë dollarë në fund të qershorit, për të arritur në rreth 61 milionë dollarë në fund të shtatorit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.