Borxhi global shënon rekord të ri – Në $164 trilion apo 225% të ekonomisë botërore, FMN paralajmëron për masa
Fondi Monetar Ndërkombëtar paralajmëroi se borxhi global ka shënuar nivelet më të larta në histori dhe se Qeveritë duhet të ndërmarrin aksione për ta reduktuar sa kanë ende mundësi.
Niveli global i borxhit rezultoi në një nivel rekord prej 164 trilionë dollarë në vitin 2016, që është ekuivalent me 225% të ekonomisë botërore, sipas raportit të monitorimit fiskal të fondit.
Ky nivel është 12% sipër nivelit rekord të vitit 2009, që erdhi menjëherë pas krizës financiare globale.
“Këto zbulime, shoqëruar me trendin pozitiv të ciklit të biznesit, nënkupton se qeveritë duhet të reduktojnë nivelet e borxhit publik për t’u përballur me sfida të pashmangshme në të ardhmen”, sipas Vitor Gaspar, drejtorit të departamentit të çështjeve fiskale të FMN.
Borxhi në ekonomitë e zhvilluiara kalon bindshëm nivelin e borxhit të ekonomive në zhvillim. Sipas raportit të fundit, borxhi mesatar i ekonomive të zhvilluara qëndroi në 105% të PBB.
Për ekonomitë me të ardhura të mesme, mesatarja e borxhit qëndronte në 50% të PBB, ndërsa për vendet me të ardhura të ulëta, norma rezultoi në 40%.
Sipas fondit, për të gjithë ekonomitë e zhvilluara përveç Shteteve të Bashkuara, borxhi publik në raport me Produktin e Brendshëm Bruto pritet të bie deri në vitin 2023. Kjo vjen kryesisht prej planit të shpenzimeve të kaluar në Kongres si dhe reduktimeve tatimore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.