Borxhi i bashkive – 7.4 miliardë lekë në fund të qershorit
Njësitë e pushtetit vendor në Shqipëri po krijojnë ende detyrime të prapambetura në përmasa shqetësuese. Sipas të dhënave nga Ministria e Financave, në mesin e këtij viti stoku i detyrimeve ende të pashlyera të këtyre njësive kishte vlerën e 7.4 miliardë lekëve ose rreth 59 milionë eurove.
Vlera neto e stokut të detyrimeve është ulur me 1 miliard lekë krahasuar me tremujorin e mëparshëm. Megjithatë, në tremujorin e dytë të vitit, janë krijuar detyrime që arrijnë vlerën 2.8 miliard lekë, që konsistojnë kryesisht në investime dhe shpenzime për mallra dhe shërbime.
Pavarësisht përpjekjeve të qeverisë për të zgjidhur problemin e detyrimeve të prapambetura, ky fenomen po vazhdon me ritme të larta, sidomos te bashkitë.
Nëse në fund të dhjetorit 2015 detyrimet e prapambetura të tyre ishin rreth 12 miliardë lekë, në qershor të këtij vlera totale e detyrimeve të krijuara ishte rreth 33 miliardë lekë, të cilat, në pjesën më të madhe, tashmë janë shlyer.
Sipas Ministrisë së Financave, në tremujorin e dytë të këtij viti janë likuiduar 3.9 miliardë lekë nga totali i detyrimeve të prapambetura.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.