Borxhi korporativ në Kinë – Ngadalësohet prej aksioneve të Qeverisë, pritet të ndikojë ekonominë
Rritja e borxhit te kompanitë kineze është ngadalësuar në nivelin më të ulët në 1 dekadë, gjë që mund të sjellë lehtësim për politikëbërësit, që janë shqetësuar për pasojat e rritjes së madhe të hasë në ekonomi. Megjithatë, ky ashpërsim në aksesimin me borxh të ri, së bashku me tkurrjen e marzheve të fitimit, mund të sjellë rreziqe për ekonominë e dytë më të madhe në botë. Borxhi total i kompanive kineze u rrit me 3% në tremujorin e parë të vitit, sipas një sondazhi të Reuters ndaj 1,843 firmave të listuara në bursat e Shangait dhe Shenzenit, që është norma më e ulët në 13 vite.
Borxhi total i kombinuar, që përfshin huamarrjen nëpërmjet kredive dhe emetimit të obligacioneve, arriti në 2.1 trilionë dollarë në fund të muajit Mars, që është norma më e ngadaltë e rritjes me bazë vjetore që prej vitit 2005. Rritja e të ardhurave ndërkohë, është përgjysmuar në 12.3% në tremujorin e parë 2018, nga 26.7% që ishte një vit më parë. Marzhet e fitimit neto u tkurrën gjithashtu në nivelin më të ulët në 2 vite, me sektorë si teknologjia e informacionit që kanë pësuar goditje.
Sipas analistëve, efektet anësore të trajtimit të nivelit të borxhit do të jenë ngadalësimi i industrisë dhe rritjes ekonomike, krahasuar me vitin 2017. Pavarësisht performancës së fortë në tremujorin e parë të ekonomisë kineze, analistët presin një ngadalësim në rreth 6.5% këtë vit, nga 6.9% që ishte në 2017-ën, ndërkohë që rritja e kostove të huamarrjes mund të kufizojë konsumin dhe investimet.
Investimet në aktive fikse të Kinës u rritën në nivelin më të ulët që prej vitit 1999 gjatë muajit Prill, ndërsa shitjet me pakicë shënuan nivelin më të ulët në 4 muaj. Shitja e shtëpive është ngadalësuar gjithashtu, ndërkohë që Qeveria ka rritur kontrollin në mënyrë që të luftojë spekulimet dhe ulë çmimet e pronave. Firmat kineze janë shqetësuar mbi kostot më të larta të financimit, ndërkohë që autoritetet vendase ndalojnë praktikat e rrezikshme të huadhënies.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.