Borxhi në 66.9% të PBB – Shifrat e qeverisë tregojnë ulje surprizë
Borxhi publik ka zbritur në 66.9% të Prodhimit të Brendshëm Bruto në mesin e këtij viti.
Sipas Ministrisë së Financave, shifrat e borxhit duken të jenë ulur edhe përtej parashikimeve më optimiste. Nga afro 71% që raportohej borxhi në fund të vitit të kaluar, ai ka zbritur me rreth 4.2 pikë përqindje.
Në buxhetin e këtij viti, vetë qeveria parashikonte që borxhi të ulej në jo më pak se 69.1% të Prodhimit të Brendshëm Bruto. Megjithatë, ky raport mat stokun e borxhit në mes të vitit kundrejt prodhimit total vjetor.
Është e pritshme që vlera nominale e borxhit të rritet më tej gjatë vitit dhe pesha e tij kundrejt prodhimit kombëtar gjithashtu. Megjithatë, mbështetur në të dhënat e gjashtëmujorit të parë, borxhi pothuajse ka ngrirë edhe në vlerë absolute.
Në fund të qershorit, borxhi publik i Shqipërisë ishte 1 trilion e 67 miliardë lekë ose rreth 8 miliardë euro. Krahasuar me fundin e vitit 2016, stoku i borxhit publik është rritur me vetëm 1 miliard lekë.
Ngrirja e stokut të borxhit i detyrohet sidomos uljes së ndjeshme të vlerës së kredive të jashtme të marra nga qeveria shqiptare. Vlera totale e huave nga kreditorë të huaj ka zbritur në 468 miliardë lekë, 13 miliardë lekë më pak krahasuar me fundin e vitit të kaluar.
Rënia me rreth 100 milionë euro e vlerës së kredive nga jashtë duket se ka qenë faktori kryesor që e ka frenuar borxhin në terma nominalë dhe e ka ulur atë ndjeshëm në terma realë.
Në pjesën e borxhit të jashtëm, qeveria shqiptare gjithashtu ka përfituar edhe nga forcimi i lekut në kursin e këmbimit, që e ka ulur vlerën ekuivalente të borxhit të marrë në euro dhe dollarë amerikanë.
Ndonëse të dhënat janë ende paraprake, duket se zgjedhjet e përgjithshme nuk kanë pasur ndikim në rritje, qoftë edhe të përkohshme, të borxhit publik të vendit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.