Borxhi publik, nivel rekod 6-mujori/ Kapërcen në 80 % të PBB, shkak COVID-19 dhe tërmeti
Dy goditjet e njëpasnjëshme që mori ekonomia shqiptare, si tërmeti i 26 Nëntorit dhe infeksioni COVID-19, kanë prodhuar një borxh publik në nivele historike në vend, duke kapërcuar shifrën prej 80 për qind të PBB, si domosdoshmëri për t’iu përgjigjur këtyre situatave. Sipas të dhënave zyrtare të Ministrisë së Financave, në gjysmën e parë të vitit, stoku total i borxhi publik ka arritur në 1.26 trilionë lekë, apo 80.02 për qind e PBB, nga afro 65.8 e PBB për qind që rezultonte në fund të vitit 2019.
Nga stoku total i huamarrjes, afro 40.4 përqind të PBB-së e zë stoku i brendshëm dhe 39.6 për qind të PBB-së, stoku i jashtëm. Ndikimin më të madh në rritjen e borxhit e ka dhënë emetimi i Eurobondit të ri prej 650 milionë euro i cili do të mbulojë një sërë investimesh si defiçencat në të ardhura nga politikat e fundit fiskale që ndërmori qeveria sa i takon Tatim Fitimit dhe TVSH-së, duke bërë që huamarrja e jashtme të rritet me 687 milionë euro, ndërsa ajo e brendshme me 144 milionë euro. Ky është niveli më i lartë i huamarrjes në raport me PBB-në, i regjistruar në 10 vitet e fundit, dhe përtej parashikimeve të qeverisë e cila çdo vit targetonte një shifër në zbritje.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.