Borxhi tatimor – Mbi 2 mijë sipërmarrje dalin nga lista debitore
Ndryshimi i komunikimit midis administratës tatimore dhe sipërmarrjes duket se ka dhënë dhe efektet e para pozitive. Kjo shihet nga numri i bizneseve që nuk paguajnë detyrimet tatimore, i cili ka ardhur në rënie gjatë muajve të parë të këtij viti. Sipas të dhënave më të fundit të publikuara nga Drejtoria e Përgjithshme e Tatimeve , ku shihet qartë se numri i bizneseve që nuk kanë paguar detyrimet nga fund i vitit të kaluar deri në muajin prill, kur është dhe përditësimi i fundit nga kjo administratë, janë ulur me mbi 2 mijë biznese .
Sipas shifrave zyrtare nga kjo drejtori, lista e bizneseve që nuk kanë paguar detyrimet tatimore ne mesin e dhjetorit është 19 834, nga 13 778 biznese që ishin në fund të vitit 2015. Referuar këtyre statistikave, kësaj “ listë të zezë” vetëm gjatë 4 mujorit të parë të këtij viti i janë hequr 2081 subjekte.
Interesit të TV SCAN, për këtë, burime nga Drejtoria e Përgjithshme e tatimeve përgjigj, se ka dy argument. E para është “zbutja” e sjelljes së kësaj administrate me sipërmarrjen, dhe e dyta, krijimi i lehtësive me anë të marrëveshjeve të posaçme për pagesat e detyrimeve me këste. Por të njëjtat burime bëjnë me dije se për pak kohë ky numër do të vazhdojë të bjerë, pasi me hyrjen në fuqi të ligjit të faljes, një pjesë e konsiderueshme e bizneseve “borxhlie” do të fshihen nga sistemi informatik i tatimeve.
Tatimorët e publikojnë listën e zezë në mënyrë që personat e tretë të marrin dijeni për fillimin e këtyre procedurave dhe që organet apo institucionet, të cilët kanë bëre regjistrime të pasurive të luajtshme apo të paluajtshme të tatimpaguesve debitorë, të regjistrojnë detyrimin tatimor të papaguar si barrë mbi këtë pasuri dhe të mos lejojnë kryerjen e transaksioneve për transferimin e tyre deri kur detyrimi tatimor të jetë paguar.
Që në fund të vitit 2013 ka ndryshuar rrënjësisht mënyra e administrimit tatimor, duke sjellë një forcim të procesit monitorues të të gjitha funksioneve të Administratës Tatimore si dhe procesi i administrimit të mbledhjes së borxhit tatimor. Evidentimi i tatimpaguesve të cilët janë subjekt i Mbledhjes së Borxhit Tatimor tashmë është një proces që kryhet automatikisht me vënien në funksionim të sistemit të ri elektronik.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.