Bota në duart e SHBA dhe Kinës – Georgieva: Dy superfuqitë duhet të vazhdojnë me stimujt fiskal
Shtetet e Bashkuara të Amerikës dhe Kina duhet të mbajnë stimulin e fortë për të ndihmuar në përshpejtimin e rimëkëmbjes ekonomike globale si pasojë e krizës së shkaktuar nga pandemia, deklaroi numri një i Fondit Monetar Ndërkombëtar, Kristalina Georgieva.
“Një rimëkëmbje më e shpejtë varet gjithashtu nga bashkëpunimi për të zhvilluar dhe shpërndarë vaksinën në mënyrë të efektshme në nivel global. Diçka e tillë mund t`i shtojë ekonomisë globale deri në 9 trilionë dollarë të ardhura deri në 2025”-shtoi Georgieva. Sipas saj, Shtetet e Bashkuara të Amerikës e kanë hapësirën fiskale por edhe kapacitetin e politikave monetare për të injektuar më shumë stimuj në sistem. Deri më tani, shpenzimet e ekonomisë më të madhe të botës kanë patur një impakt mjaft pozitiv në pjesën tjetër të planetit për të përballuar krizën. Deri më tani, Washingtoni ka injektuar rreth 3 trilionë dollarë në sistem, ndërkohë që po negociohet paketa e radhës.
Donald Trump ka propozuar 1.8 trilionë dollarë ndihma shtesë, ndërkohë që demokratët kërkojnë 2.2 trilionë dollarë. Edhe Kina, shtoi Georgieva, ka kontribuar me stimuj mjaft të fuqishëm në ekonominë globale.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.