BQE do flasë në shtator – Ekspertët presin që të njoftojë ndryshimin e “bazookës”
Banka Qendrore Europiane me shumë gjasa do të njoftojë ndryshimin e programit të lehtësimit sasior në shkallë të gjerë në muajin Shtator.
Të paktën këtë besojnë ekspertët, të cilët shohin Shtatorin si muajin më të mundshëm, në krahasim me Tetorin.
Banka Qendrore Europiane la të pandryshuar programin e blerjes së titujve në 60 miliardë euro në muaj, gjatë takimit të fundit të Korrikut. Por, tregjet prej kohësh presin një ndërhyrje.
Tashmë që presionet deflacioniste janë zhdukur dhe në një kohë që Eurozona ka hyrë në ciklin më të vrullshëm të një dekade, shumë vende anëtare, me në krye Gjermaninë, kërkojnë normalizimin gradual të politikave monetare.
Banka qendrore ndërkohë ka bërë apel për kujdes, por jo të tepruar.
Një anketë e fundit tregon se, pjesa dërrmuese e analistëve janë të mendimit se njoftimi i shumëpritur do të vijë në muajin Shtator. Vetëm një pjesë e vogël mendon se ndërhyrja do të vijë në Tetor, apo edhe në fillim të vitit të ardhshëm.
Ekspertët janë të bindur se vetë banka ka sinjalizuar Shtatorin si muajin e njoftimit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.