BQE do i rikthehet stimujve – Ekonomistët presin ulje të interesave. Janë skeptikë për inflacionin
Banka Qendrore Europiane pritet të ulë normën e interesit për depozitat në javën e ardhshme dhe të rinis programin e blerjeve në treg të hapur.
Megjithatë, sipas një sondazhi të Reuters, 80% e ekonomistëve të anketuar ishin skeptik mbi aftësinë e bankës për të ndikuar te inflacioni në terma afat-mesëm.
Një vit më parë, Banka Qendrore Europiane përfundoi programin e lehtësimit sasior (QE) prej 2.6 trilionë euro dhe udhëzoi rritjen e normave të interesit në fund të 2019-ës.
Megjithatë, institucioni në Frankfurt ka ndryshuar kurs, së bashku me homologët në vendet e zhvilluara. Lufta tregtare mes Kinës dhe Shteteve të Bashkuara kanë ngadalësuar ekonominë botërore dhe Gjermania, ekonomia më e madhe e Europës, po i afrohet recesionit.
Sipas sondazhit të ndërmarrë në fund të muajit Gusht, thuajse 70% e ekonomistëve prisnin që Banka Qendrore Europiane të ulë normën e interesit në takimin e 12 Shtatorit me 10 pikë bazë, në -0.5%.
Thuajse 90% e të anketuarve thanë se BQE do të prezantojë një formë kompensimi për bankat, që t’i bëjnë ballë “efekteve anësore” nga normat negative të interesit. Thuajse të gjithë ekonomistët e anketuar presin gjithashtu që institucioni të rinisë programin e printimit të parasë, me një vlerë mujore prej 30 miliardë euro.
Mbi 80% e ekonomistëve thanë se nuk kanë besim që institucioni mund të kontrollojë nivelin e çmimeve.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.