BQE është gati – Coeure: Kemi blerë mjaftueshëm tituj për t`u tërhequr nga programi
Banka Qendrore Europiane tashmë ka blerë mjaftueshëm tituj në mënyrë që të tërhiqet në mënyrë të sigurt nga programi i blerjes së titujve, deklaroi anëtari i bordit drejtues të bankës, dhe një prej zërave më aktiv brenda institucionit, Benoit Coeure.
Njëherë që blerjet e bankës të prekin pikën kritike, duhen edhe disa blerje shtesë në mënyrë që të përmbahen yieldet, dhe ky është rasti konkret i titujve gjermanë, që është edhe ekonomia më e madhe e Eurozonës, deklaroi ai.
Megjithëse ai nuk e tha tekstualisht, tregjet gjatë javës me shumë gjasa do të rrisin pritshmëritë për një shtrëngim më të shpejtë të politikave monetare nga ana e Bankës Qendrore Europiane.
Prej thuajse një viti, debati mbi përfundimin e programit të blerjes së titujve ka qenë mjaft aktiv brenda eurozonës, me Gjermaninë që kërkon medoemos fundin e lehtësimit sasior në shkallë të gjerë. Tregjet presin që programi të përfundojë brenda fundit të këtij viti, pra tre vite e gjysmë pas nisjes.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.