BQE: Jo më lehtësim – Normat e interesit do të rrinë gjatë në këtë nivel

Banka Qendrore Europiane nuk befasoi askënd, duke mbajtur të pandryshuara politikat monetar, si normat e interesit ashtu edhe programin e stimujve. E vetmja surprizë është fakti se, institucioni me bazë në Frankfurt për të parën herë, përjashtoi mundësinë e lehtësimit të mëtejshëm monetar. Ndër të tjera, institucioni parashikon që normat e interesit të mbeten pranë këtyre niveleve për një periudhë të tejzgjatur kohore, madje edhe përtej programit të blerjes së titujve.

Ky i fundit ndërkohë, do të ndryshojë, duke u zgjeruar, në rast se, kushtet ekonomike në rajonin e monedhës së përbashkët do të përkeqësohen.  Sa i përket reduktimit gradual të këtij programi, në kohë dhe në masë, vetë Mario Draghi, deklaroi në konferencën për shtyp se, nuk u diskutua aspak diçka e tillë në takimin e së enjtes.

Banka Qendrore Europiane rriti projeksionet e rritjes ekonomike për këtë vit dhe atë të ardhshëm, në 1.9 dhe 1.8% respektivisht, nga 1.8 dhe 1.7% që vlerësonte më parë. Projeksionet për normën e inflacionit ndërkohë u rishikuan në territor negativ. Tregjet financiare nuk reaguan pas vendimit të bankës dhe fjalës së Mario Draghit, pasi u përmbushën të gjitha pritshmëritë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.