BQE lehtëson politikat monetare – Në shtator pritet të ulë më tej normën e interesit për depozitat
Banka Qendrore Europiane do të ulë normën e interesit për depozitat në takimin e Shtatorit, pavarësisht se presidenti Mario Graghi, sinjalizoi se kjo ndërhyrje mund të vijë që në takimin e korrikut. Sipas një sondazhi të realizuar nga Reuters, shumica e analistëve mendojnë se ekonomia e Eurozonës nuk do të njohë ndonjë zgjerim të konsiderueshmën së shpejti.
Bankat qendrore më të mëdha të botës në të dyja anët e Atlantikut janë nën presion për të lehtësuar politikat monetare, për të parandaluar një rënie të mëtejshme të inflacionit, në një kohë që ekonomia globale po ngadalësohet, proteksionizmi po rritet dhe të dhënave të dobëta ekonomike. Kur u pyetën se çfarë do të bëjë Banka Qendrore Europiane në takimin e korrikut, 2/3 e ekonomistëve shprehen se do të ndryshojë udhëzimin për të ardhmen drejt lehtësimit të politikave monetare. Me inflacionin shumë poshtë objektivit të bankës qendrore, BQE pritet të ulë normën e depozitave me 10 pikë bazë në një nivel të ri rekord prej -0.50%.
Kjo do të thotë se bankat e nivelit të dytë duhet të paguajnë interes prej 0.5% për të depozituar paratë e tyre pranë Bankës Qendrore Europiane. Gjithashtu, Këshilli Drejtues pritet të sinjalizojë se do të bëjë më tepër nëse do të jetë e mundur. Aktualisht inflacioni gjendet në 1.3%, një nivel më i ulët krahasuar me periudhën kur BQE mbylli programin e blerjes së bonove prej 2.6 trilionë euro në muajin dhjetor.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.