BQE mbështet integrimin – Draghi: Fuqizimi i unionit vjen me një buxhet të përbashkët
Presidenti i Bankës Qendrore Europiane, Mario Draghi, i bëri thirrje vendeve të Eurozonës që të mbështesin integrimin. Draghi tha se është i rëndësishëm fuqizimi i unionit dhe në disa shtete, kjo arrihet nëpërmjet integrimit të mëtejshëm.
Eurozona përbëhet nga 19 shtete që ndajnë valutën e përbashkët. Politikat monetare caktohen nga BQE, që është vendosur në Frankfurt. Megjithatë, politikat fiskale caktohen në nivel kombëtar, çka krijon shpesh mospërputhje dhe e ekspozon rajonin ndaj goditjeve financiare.
Ndërkohë që disa vende argumentojnë se duhet të përshtaten me politikat fiskale, të tjera ngurojnë që t’i japin më shumë fuqi institucioneve europiane, prej shqetësimeve se do humbasin kontrollin e ekonomive apo se do financojnë vendet me borxh të madh.
“Për të pasur një union më të fortë monetar dhe ekonomik, na duhet një buxhet i përbashkët i Eurozonës. Ka ende debate për këtë çështje, por jam optimist”, tha Mario Draghi, duke mbështetur një plan që presidenti francez Emmanuel Macron është përpjekur ta zbatojë. Ministrat europian të Financave ranë dakord që të krijojnë një buxhet të përbashkët të Eurozonës më herët gjatë vitit.
Megjithatë, detajet e këtij mekanizmi janë edhe të paqarta për shkak të çështjeve si financimi dhe përmasa. Draghi ka kritikuar prej kohësh vendet anëtare që nuk mbështesin sa duhet ekonominë e Eurozonës. Ai tha se vetëm politikat monetare nuk mjaftojnë për të nxitur ekonominë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.