BQE mbi trazirat e fundit në tregje – “Të përmbajtura te titujt e kapitalit, nuk kanë patur ndikim të gjerë”

Benoit Coeure, anëtari i bordi të Bankës Qendrore Europiane, tha se institucioni nuk është i shqetësuar mbi luhatjen e kohëve të fundit që ndodhi në tregjet global,  ndërkohë që përshtatja ka ndodhur  në mënyrë të rregullt dhe ndikimi është shfaqur vetëm në titujt e kapitalit.

Coeure tha se luhatja është diçka normale, megjithatë shtoi se po monitoron kushtet financiare për të parë nëse kjo trazirë ka patur ndikim më të gjerë drejt ekonomisë reale. “Luhatja në tregje është diçka normale. Deri më tani, ajo që kuptojmë është se korrigjimi ka qenë i rregullt dhe përhapja në Eurozonë është përmbajtur brenda tregjeve të kapitalit”, tha Coeure.

Duke përsëritur udhëzimin e vjetër të banës,  ai tha se normat e interesit nuk do të rritën deri sa programi i blerjes së titujve të borxhit të përfundojë dhe të ketë një marrëveshje nga të gjithë politikëbërësit e bankës. Programi prej 2.55 trilionë euro i institucionit në Frankfurt pritet të zgjasë deri në fund të muajit Shtator.

Ekonomistët projektojnë që banka do të presë 6 muaj të tjerë pas përfundimit të këtij programi, përpara se të nisin rritjen e normave të interesit, duke i nxjerrë kështu nga niveli negativ në vitin 2019.

Banka Qendrore Europiane i ka mbajtur të ulëta kostot e huamarrjes prej vitesh, me synim që të nxisë konsumin e investimet dhe duke shkaktuar kështu presione te niveli i çmimeve.  Ndërkohë që masat kanë dhënë rezultatin, pasi ekonomia e Eurozonës ndodhet në një periudhë të fortë të rritjes, inflacioni qëndron ende larg objektivit të institucionit në parnë 2%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.