BQE ndryshon objektivin e inflacionit në 2% / Lagarde: Synimi i ri është “i qartë dhe i lehtë për t’u komunikuar”

Në një rishikim drastik të politikave monetare, Banka Qëndrore Europiane (BQE) ka vendosur të ndryshojë objektivin e inflacionit dhe të lejojë që çmimet e konsumit të rriten më shumë, kur gjykohet e nevojshme. Aktualisht, BQE punon për të arritur një inflacion “poshtë, por pranë 2%. Por, në vijim objektivi do të jetë për një inflacion prej 2%, me mundësitë për tu rritur edhe më tej nëse do të jetë e nevojshme. “Këshilli Drejtues konsideron se stabiliteti i çmimeve ruhet më së miri duke synuar një objektiv të inflacionit prej 2%, në terma afatmesëm”, thuhet në deklaratën e BQE. Duke folur në një konferencë për mediat ku njoftoi vendimet mbi politikat monetare, presidentja e BQE, Christine Lagarde deklaroi se objektivi i ri i inflacionit është “i qartë dhe i lehtë për tu komunikuar.” Takimi i parë i rregullt i Këshillit Drejtues mbi politikat monetare, që do të zbatojë strategjinë e re do të zhvillohet më 22 korrik. Vitin e kaluar, edhe Rezerva Federale në Shtetet e Bashkuara njoftoi se do t’a lejojë inflacionit të rritet më shumë se normalisht për të mbështetur tregun e punës dhe rritjen ekonomike. Në praktikë, kjo do të thotë se ka pak gjasa që bankat qëndrore të rrisin normat e interesit. Përpjekja e fundit e BQE vjen pas një periudhe të gjatë të inflacionit të ulët dhe është një vendim veçanërisht i rëndësishëm në këtë periudhë që ekonomia përpiqet të rimëkëëmbet nga kriza e Covid-19.

Lidion Kulla – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.