BQE paralajmëron shtetet – “Kur të rrisim normat e interesit, mos u ankoni te ne”

“Banka Qendrore Europiane do i injorojë shqetësimet dhe ankesat e qeverive të rajonit për rritjen e kostove të huamarrjes, kur të vijë dita që politikat monetare të marrin kahun shtrëngues, dhe banka nuk do të ndihmojë asnjë shtet”, deklaroi kryeekonomisti i institucionit me bazë në Frankfurt, Peter Praet.

Vendet anëtare të Eurozonës i shqetësohen faktit se kur programi i blerjes së titujve të mbarojë, yeildet do të rriten.

Kostot më të larta të financimit për rrjedhojë do të modifikojnë trajektoren e rritjes, duke dëmtuar vendet me borxh të lartë, si Italia, Spanja dhe Portugalia.

“Nëse kjo ndodh, atëherë ky nuk është një problem i politikave monetare”, nënvizoi Praet, duke e hequr tërësisht përgjegjësinë nga Banka Qendrore.

Mesazhi i Bankës është i qartë: vendet anëtare duhet të përgatiten për këtë ditë, dhe të mos bëjnë sikur nuk e dinin në momentin që do të ndodhë.

Gjatë mbledhjes së fundit, Banka Qendrore Europiane dha sinjalin e parë për normalizimin e politikave monetare, dhe mesa duket ka ardhur koha që të fillojnë përgatitjet.

“Kur kjo ditë të vijë, ne do të merremi me inflacionin dhe do të veprojmë, pa marrë parasysh fare ankesat e qeverive”, shtoi Peter Praet, kryeekonomisti i Bankës Qendrore Europiane.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.