BQE përballë krizave – Mersch: Duhet të ketë një rol më të madh në stabilitetin financiar

Anëtari i bordit të Bankës Qendrore Europiane, Yves Mersch, tha se institucioni duhet të ketë më shumë fuqi në luftën kundër flluskave financiare, ndërkohë që mjeteve të përdorura nga autoritetet kombëtare i mungon koherenca. Ndërkohë që Banka Qendrore Europiane ka mbajtur interesat në nivel rekord të ulët prej vitesh, rreziku i flluskave financiare është rritur dhe detyra e autoriteteve kombëtare është ruajtja e stabilitetit financiar nëpërmjet mjeteve si mbrojtësit e kapitalit të bankave apo rregullave të kufizimit të huadhënies.

“Zgjidhja më e mirë është integrimi i problemeve të stabilitetit financiar në nivel europian”, tha ai. Ndërkohë që interesat kanë qëndruar të ulëta prej vitesh, politikëbërësit kanë debatuar nëse bankat qendrore duhet të kenë rol më të madh në luftën kundër flluskave financiare.

Disa argumentojnë se shtimi i një tjetër objektivi përveç stabilitetit të çmimeve, mund të krijojë rrezikun që Banka Qendrore Europiane të përballet me objektiva kontradiktorë. Të tjerë thonë se ndërhyrja e shumë palëve në çështjet e stabilitetit mund të sjellë lehtësisht gabime në politika, për shkak të mungesës së koordinimit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.