BQE, përballë valës së dytë – Lagarde: Kemi një arsenal të stimujve ekonomikë në disponueshmëri

Presidentja e Bankës Qendrore Evropiane, Christine Lagarde, tha se institucioni është i gatshëm për të vendosur masa të reja të emergjencës për të trajtuar krizën ekonomike të koronavirusit, ndërkohë që infeksionet e reja po rriten ndjeshëm. “Mbase po shohim një valë të dytë në horizont dhe duhet të sigurohemi se kemi të gjithë arsenalin në disponueshmëri për t’i bërë ballë situatës”, – tha Lagarde, duke shtuar se po konsiderohet një rritje në shpenzimet fiskale nga shumë vende anëtare, ndërkohë që prezantojnë buxhetet.

Lagarde tha se të gjithë armët janë të gatshme, që variojnë nga normat e interesit, udhëzimet dhe programet e blerjes së aktiveve. Europa ka regjistruar mbi 7.4 milionë raste me koronavirus, sipas Organizatës Botërore të Shëndetësisë, me 251,478 vdekje.   Rikthimi i fortë i virusit në rajon, ka bërë që Franca të shpallë gjendjen e emergjencës së shëndetit publik, ndërkohë që Gjermania dhe Britania kanë lajmëruar masa të reja gjithashtu. Banka Qendrore Evropiane ndodhet në procesin e rishikimit të parë të strategjisë në thuajse 2 dekada, ndërkohë që politikëbërësit po diskutojnë se si mund të menaxhojnë më mirë inflacionin. Një fushë që Lagarde ka sugjeruar më parë është rishikimi i kufirit simbolik prej 2% të inflacionit.  Institucioni ka dështuar ta prekë objektivin për thuajse 1 dekadë.  Kriza e koronavirusit ka bërë që çmimet të bien më tej, çka ka nxitur një debat të gjerë mbi efektshmërinë e objektivit të bankave.  Rezerva Federale në SHBA, përditësoi politikat në fund të muajit Gusht, ku lejoi inflacionin që të kalojë objektivin prej 2% për disa kohë. Kjo nënkupton se banka qendrore nuk do të rrisë normat e interesit në muajt e ardhshëm.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.