BQE thirrje qeverive – Të shpenzojnë më shumë në shëndetësi, edukim dhe infrastrukturë
Banka Qendrore Europiane deklaroi se Qeveritë e Eurozonës duhet të rrisin shpenzimet në shëndetësi, edukim dhe infrastrukturë. Studimi i Bankës në Frankfurt tregon nevojën e investimeve më të mëdha në rajon, ku shumë vende kanë borxhe të mëdha publike dhe perspektivë të varfër për rritjen ekonomike në terma afat-gjatë, pavarësisht të dhënave pozitive gjatë kohëve të fundit.
Pas disa vitesh të tkurrjes së buxheteve qeveritarë, Banka Qendrore Europiane rekomandoi kanalizimin e shpenzimeve në kategori që janë më mbështetëse ndaj rritjes ekonomike si edukimi, shëndetësia dhe infrastruktura.
“Kujdes i veçantë duhet kushtuar në përcjelljen e më shumë burimeve në fusha si shëndetësia, edukimi apo infrastruktura, pasi shpenzimet të tilla kanë treguar rezultate pozitivë në rritjen afat-gjatë”, shkruan Banka Qendrore Europiane në raport. Institucioni, që ka mundësuar qarkullimin e parasë së lirë në Eurozonë, ka kontribuar në rimëkëmbjen e fortë ekonomike në bllokun e valutës së përbashkët gjatë vitit të fundit.
Megjithatë, banka ka paralajmëruar se kjo nuk do të zgjasë nëse nuk ndërmerren masa strukturore nga Qeveritë dhe autoritetet europiane. Ndër masat e nënvizuara në studim, Banka rekomandoi lehtësimin e barrës tatimore për punëtoret e kompanitë, duke u përqendruar më shumë te prona dhe konsumi.
Banka Qendrore Europiane, përgjegjëse për politikat monetare në Eurozonë, nuk ka autoritet mbi qëndrimet fiskale të qeverive, por anëtarë të bordit marrin pjesë në takimet e ministrave të financave të rajonit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.