Braktisja e shkollave – Vokshi: Jemi në ditët më dramatike që arsimi po përjeton prej kalimit në demokraci
“Braktisja e shkollave në 4 vjet nga 133 mijë nxënës e studentë është tregues se si varfëria e thelluar këto 4 vjet është kthyer në armiken kryesore të arsimit.” Kështu është shprehur deputetja e Partisë Demokratike, Albana Vokshi, në një deklaratë për mediat lidhur me statistikat e publikuara nga INSTAT mbi numrin e nxënësve që kanë braktisur shkollat.
Vokshi shtoi më tej se rënia është reflektuar edhe te Arsimi Profesional, ku sipas saj shkollat profesionale u degraduan në 4 vjet. Shkak sipas saj është lufta e brendshme politike për vjedhjen e fondeve, duke hedhur akuza mbi ministren e Arsimit dhe krybashkiakun e Tiranës.
Sipas Vokshit, kryeministri Rama jo vetëm që nuk e ka prioritet arsimin, por madje e ka politizuar atë.
“133 mijë nxënës dhe studentë i kanë braktisur shkollat në 4 vjet, sepse Edi Rama e politizoi arsimin. 1 në 4 mësues nuk është i kualifikuar për të dhënë mësim, sepse në portalin e Edi Ramës ka inflacion eurosh. “Kliko përgjigjen e saktë në zarfin 5 mijo euro për t’u bërë mësues!”- është motoja e Rilindjes për arsimin”, u shpreh Vokshi.
Ndërkohë, duke theksuar se arsimi mbetet prioritar për Partinë Demokratike, shtoi se PD do të sigurojë tekste falas për të gjithë fëmijët që ndjekin arsimin publik pa përjashtim, si dhe do të ofrojë mbështetje për nxënësit e studentët e familjeve në nevojë.
“Do mbështesë financiarisht nxënësit e talentuar e të shkëlqyer. PD do të mbështesë mësuesit e pedagogët duke siguruar kushte të mira e dinjotoze punë. PD me të ardhur në pushtet do të shfuqizojë Ligjin e Arsimit të Lartë. Për Partinë Demokratike, arsimi cilësor është prioritet i të gjitha prioriteteve, në radhë të parë si kontributi më madhor për rininë dhe të ardhmen!”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.