Brazili do prodhojë vaksinën e AstraZeneca / Do krijojë dhe ingredientët kimikë që i importonte nga Kina
Brazili ka nënshkruar një kontratë të transferimit të teknologjisë me kompaninë farmaceutike AstraZeneca, për të prodhuar vaksinën e Covid-19 të zhvilluar me Universitetin e Oksfordit. Marrëveshja do të lejojë institutin biomjekësor Fiocruz që të ketë akses të plotë në metodën e prodhimit të vaksinës si dhe manifakturën brenda vendit të “Ingredientit Aktiv Farmaceutik” (API), që është përbërës kryesor i vaksinës. Fiocruz ka prodhuar vaksinën e AstraZeneca, por ka importuar ingredientin aktiv nga shtete të tjera, kryesisht nga Kina. Presidenti brazilian Jair Bolsonaro, tha se marrëveshja do ta kthejë brazilin në “eksportues” të vaksinës. Ministri i Shëndetësisë, Marcelo Queiroga, tha se kjo përbën një hap strategjik për luftën kundër pandemisë. Rënia e prodhimit lokal të vaksinës ka ngadalësuar ritmin e imunizimit në Brazil dhe ka bërë që shumë njerëz të mos marrin dozat e dyta. Sipas të dhënave zyrtare, Brazili ka administruar 21 milionë doza të vaksinës së Covid në Maj, në rënie me 14.2% nga 24.5 mln dozat e Prillit. Ekspertët thonë se mungesa e dozave, së bashku me keqinformimin mbi vaksinën, ka bërë që miliona brazilian të marrin vetëm 1 dozë deri më tani. Mungesa e ingredientëve kimik, kryesisht të marrë nga Kina, ka bërë që 2 qendrat kryesore të prodhimit në Brazil, Fiocruz dhe Butantan në Sao Paulo, të ndalojë përkohësisht prodhimin.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.