Brazili kthehet në epiqendrën e pandemisë / Mbi 300,000 vdekje nga Covid-19. Rreth 1/4 e fataliteteve të reja në botë
Brazili ka kaluar 300,000 vdekje nga koronavirusi, ndërkohë që shteti më i madh i Amerikës Latine është kthyer në epiqendrën botërore të pandemisë.
Sipas raportimeve, një në katër vdekje në botë nga Covid-19 janë brazilianë. Infeksioni po arrin fazën më të keqe në vend, ndërkohë që vaksinimi ka qenë i ngadaltë, masat e karantinës kanë dështuar dhe prej shfaqjes së një varianti të ri më infektues. Përmasa e infeksionit po shton presionet ndaj Bolsonaro, që ka fituar famë ndërkombëtare për kundërshtimin e masave të karantinës, dyshimin mbi vaksinat dhe mbështetjen ndaj kurave të paprovuara si hidroksiklorokina. Ndërkohë që pandemia është përkeqësuar, presidenti është përpjekur ta marrë më seriozisht. Rikthimi i rivalit të majtë, Luiz Inacio Lula da Silva, duket se ka nxitur atë të veprojë. Akuzat për korrupsion ndaj Lula janë hedhur poshtë së fundmi, duke mundësuar atë që të garojë në zgjedhjet e vitit të ardhshëm.
Në një deklaratë gjatë Javës, Bolsonaro mbrojti mënyrën se si ka trajtuar pandeminë dhe premtoi se do të përshpejtojë vaksinimin. Ai tha se qeveria do të koordinohet me guvernatorët shtetërorë, nëpërmjet takimeve javore ku do diskutohen masat për të luftuar pandeminë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.