Brazili nis vaksinimin në masë/ Rregullatorët miratojnë vaksinën kineze dhe të AstraZeneca

Brazili do të nisë vaksinimin në masë kundër Covid-19 këtë Javë, sipas ministrit të Shëndetësisë, Eduardo  Pazuello.  Qeveria federale do të nisë shpërndarjen e vaksinave në të gjithë vendin duke nisur nga e Hëna, tha Pazuello në një konferencë në Rio de Janeiro.   Në fundjavë, Agjencia rregullatore e barnave miratoi për përdorim emergjent vaksinën CoronaVac të zhvilluar nga laboratori kinez Sinovac, si dhe vaksinën e AstraZeneca me Universitetin e Oksfordit.

“Pasi u dha miratimi për përdorim emergjent, unë i kërkova menjëherë departamentit të logjistikës tek ministria që të nisë organizimin e transportit të dozave të vaksinës ndaj secilit shtet, duke marrë në konsideratë zonat dhe popullsinë me prioritet.”

 Dërgesa e parë e shpërndarë në Brazil është CoronaVac  e firmës kineze, në bashkëpunim me institutin Butantan në Sao Paolo.  Në total, 6 milionë doza janë paketuar dhe do shpërndahen tek secili shtet.   Njerëzit sipër 60 vjeç, aborigjenët dhe punonjësit e shëndetësisë, do kenë prioritet në marrjen e dozës së parë.

“Shtetet e rrezikuara, me normat më të mëdha të infeksionit dhe të vdekjeve, do të kenë pjesën më të madhe të vaksinave. Në rajone të tjera më pak të rrezikuara, qeveritë lokale do të organziojnë vaksinimin për njerëzit hap pas hapi.”

Pavarësisht programit të vaksnimit, ministri i bëri thirrje popullsisë që të vazhdojë masat parandaluese si veshja e maskave, distancimi social dhe dezinfektimi i duarve.  Brazili ka mbi 8.4  milionë raste të konfirmuara me Covid-19 dhe mbi 209,000 vdekje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.