Brenda 2018, Shkodra do të ketë qendrën e integruar ADISA – Mesi: Do të ofrojë mbi 330 shërbime
Pas Tiranës, Kavajës, Fierit, Krujës dhe Gjirokastrës, edhe qyteti i Shkodrës do të ketë Brenda vitit 2018 qendrën e saj të integruar ADISA. Lajmin e ka bërë të ditur zëvendëskryeministrja, Senida Mesi, e cila udhëheq edhe reformën në Administratën Publike.
Sipas Mesit, kjo qendër pritet të ofrojë mbi 330 shërbime nga 9 institucione shtetërore, si: Zyra Vendore e Regjistrimit të Pasurive të Paluajtshme (ZVRPP) Shkodër; Drejtoria Rajonale e Sigurimeve Shoqërore (DRSSH) Shkodër; Drejtoria Rajonale e Fondit të Sigurimit të Detyrueshëm të Kujdesit Shëndetësor (DRFSDKSH) Shkodër; Drejtoria e Përgjithshme e Gjendjes Civile (DPGJC) Shkodër; Qendra Kombëtare e Biznesit që do të përfshijë Qendrën Kombëtare të Regjistrimit dhe Qendrën Kombëtare të Licencimit, QKB (QKL DHE QKR); Drejtoria Rajonale e Tatimeve (DRT) Shkodër; Posta Shqiptare; një sportel banke dhe zyra e ALEAT.
Po ashtu, qendra e cila parashikohet të çelet në godinën aktuale të konviktit ‘Safet Spahiu’ do të ketë rreth 20 sportele shërbimi dhe mbi 30 të punësuar. Sipas Mesit, kjo qendër do të reduktojë ndjeshëm kohën e marrjes së shërbimeve për qytetarët.
“Shërbime të standardizuara, luftë ndaj korrupsionit, më pak kohë e shpenzuar për qytetarët e sipërmarrësit, si dhe më tepër efiçiencë e transparencë për çdo shërbim të ofruar”, u shpreh Mesi.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.